Cookies چییە؟

کوکی بریتییە لە فایلێکی بچووک کە سێرڤەر دەنێرێت بۆ وێبگەڕی بەکارهێنەر (Browser). ئەم داتایە لەلای بەکارهێنەر هەڵدەگیرێت و لە سەردانەکانی داهاتوودا سێرڤەر دەتوانێت بیخوێنێتەوە. کوکی زۆر بەکاردێت بۆ ناسینەوەی بەکارهێنەر، هەڵگرتنی پێشینەی هەڵبژاردنەکان، یان درێژەدان بە دانیشتنەکان (Sessions).

تێبینی: کوکییەکان لەسەر ئاستی وێبگەڕ هەڵدەگیرێن، بۆیە ئەگەر بەکارهێنەر وێبگەڕەکەی بگۆڕێت، کوکییەکە لەوێ نابێت.

دروستکردنی Cookie

بۆ دروستکردنی کوکی لە PHP، فانکشنی setcookie() بەکاردەهێنین. ئەم فانکشنە پێویستی بە ناوی کوکییەکە و بەهاکەی هەیە.


<?php
$cookie_name = "user";
$cookie_value = "Ahmad";
setcookie($cookie_name, $cookie_value, time() + (86400 * 30), "/"); // 86400 = 1 day
?>

لە نموونەکەدا، time() + (86400 * 30) واتە کوکییەکە بۆ ماوەی ٣٠ ڕۆژ کارا دەبێت. نیشانەی "/" واتە کوکییەکە لە هەموو لاپەڕەکانی ماڵپەڕەکەدا بەردەست دەبێت.

خوێندنەوەی بەهای Cookie

بۆ بەکارهێنانی کوکییەک کە پێشتر دروستکراوە، سوود لە سوپەرگلۆباڵی $_COOKIE وەردەگرین.


<?php
if(!isset($_COOKIE["user"])) {
    echo "کوکییەکە دروست نەکراوە!";
} else {
    echo "ناوی بەکارهێنەر: " . $_COOKIE["user"];
}
?>

ئەگەر کۆدی سەرەوە جێبەجێ بکەیت، ناوی "Ahmad" نیشان دەدات. هەڵەی باو لێرەدا ئەوەیە کە هەوڵ دەدەیت کوکییەکە دەستبەجێ دوای دروستکردنی بخوێنیتەوە؛ پێویستە لاپەڕەکە جارێک ڕیفرێش بکرێت تا وێبگەڕەکە کوکییەکە تۆمار بکات.

سڕینەوەی Cookie

بۆ سڕینەوەی کوکی، تەنها پێویستە کاتەکەی بۆ ڕابردوو بگۆڕین بە بەکارهێنانی time() - 3600.


<?php
// دانانی کات بۆ یەک کاتژمێر پێش ئێستا
setcookie("user", "", time() - 3600);
?>

گرنگی ئاسایش لە Cookies

هەرگیز زانیاری هەستیار وەک وشەی نهێنی (Password) یان داتای تایبەتی بەکارهێنەر لە کوکی هەڵمەگرە، چونکە کوکییەکان لەلایەن بەکارهێنەرەوە دەستکاری دەکرێن و بە ئاسانی دەبینرێن.

چۆنیەتی پشکنینی کوکی لە وێبگەڕ

دەتوانیت لە ڕێگەی وێبگەڕەکەتەوە کوکییەکان ببینیت:

  • کلیک لە F12 بکە (Inspect).
  • بڕۆ بۆ بەشی Application.
  • لە لای چەپ، بەشی Cookies هەڵبژێرە.

تمرین (Practice)

هەوڵ بدە کوکییەک بە ناوی theme دروست بکەیت و بەهای dark ی پێ ببەخشیت کە بۆ ماوەی ٧ ڕۆژ بمێنێتەوە، پاشان لە لاپەڕەیەکی تردا بەکارهێنەر ئاگادار بکەرەوە کە "تێمی تاریک چالاک کراوە".